‘‘มม สงฺกปฺปมญฺญาย, พฺยมฺหํ นิพฺพตฺตเต สุภํ;

สยนานิ มหคฺฆานิ, เวทิกาย อิทํ ผลํฯ

[65]

‘‘สตสหสฺสิโต กปฺเป, ยํ เวทิกมการยิํ;

ทุคฺคติํ นาภิชานามิ, เวทิกาย อิทํ ผลํฯ

[66]

‘‘กิเลสา ฌาปิตา มยฺหํ…เป.… วิหรามิ อนาสโวฯ

[67]

‘‘สฺวาคตํ วต เม อาสิ…เป.… กตํ พุทฺธสฺส สาสนํฯ

[68]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา เวทิการโก เถโร อิมา คาถาโย

อภาสิตฺถาติฯ

เวทิการกตฺเถรสฺสาปทานํ นวมํฯ

10. โพธิฆรทายกตฺเถรอปทานํ

[69]

‘‘สิทฺธตฺถสฺส ภควโต, ทฺวิปทินฺทสฺส ตาทิโน;

ปสนฺนจิตฺโต สุมโน, โพธิฆรมการยิํฯ

[70]

‘‘ตุสิตํ อุปปนฺโนมฺหิ, วสามิ รตเน ฆเร;

น เม สีตํ วา อุณฺหํ วา, วาโต คตฺเต น สมฺผุเสฯ

[71]

‘‘ปญฺจสฏฺฐิมฺหิโต กปฺเป, จกฺกวตฺตี อโหสหํ;

กาสิกํ นาม นครํ, วิสฺสกมฺเมน [วิสุกมฺเมน (สฺยา. ก.)] มาปิตํฯ

[72]

‘‘ทสโยชนอายามํ, อฏฺฐโยชนวิตฺถตํ;

น ตมฺหิ นคเร อตฺถิ, กฏฺฐํ วลฺลี จ มตฺติกาฯ

[73]

‘‘ติริยํ โยชนํ อาสิ, อทฺธโยชนวิตฺถตํ;

มงฺคโล นาม ปาสาโท, วิสฺสกมฺเมน มาปิโตฯ

[74]

‘‘จุลฺลาสีติสหสฺสานิ, ถมฺภา โสณฺณมยา อหุํ;

มณิมยา จ นิยฺยูหา, ฉทนํ รูปิยํ อหุฯ

[75]

‘‘สพฺพโสณฺณมยํ ฆรํ, วิสฺสกมฺเมน มาปิตํ;

อชฺฌาวุตฺถํ มยา เอตํ, ฆรทานสฺสิทํ ผลํฯ

[76]

‘‘เต สพฺเพ อนุโภตฺวาน, เทวมานุสเก ภเว;

อชฺฌปตฺโตมฺหิ นิพฺพานํ, สนฺติปทมนุตฺตรํฯ

[77]

‘‘ติํสกปฺปสหสฺสมฺหิ, โพธิฆรมการยิํ;

ทุคฺคติํ นาภิชานามิ, ฆรทานสฺสิทํ ผลํฯ

[78]

‘‘กิเลสา ฌาปิตา มยฺหํ…เป.… วิหรามิ อนาสโวฯ

[79]

‘‘สฺวาคตํ วต เม อาสิ…เป.… กตํ พุทฺธสฺส สาสนํฯ

[80]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา โพธิฆรทายโก เถโร อิมา คาถาโย

อภาสิตฺถาติฯ

โพธิฆรทายกตฺเถรสฺสาปทานํ ทสมํฯ

วิภีตกวคฺโค ปญฺจจตฺตาลีสโมฯ

ตสฺสุทฺทานํ –

วิภีตกี โกลผลี, พิลฺลภลฺลาตกปฺปโท;

อุตฺตลมฺพฏกี เจว, อาสนี ปาทปีฐโกฯ

เวทิโก โพธิฆริโก, คาถาโย คณิตาปิ จ;

เอกูนาสีติกา สพฺพา, อสฺมิํ วคฺเค ปกิตฺติตาฯ

46. ชคติทายกวคฺโค